قصيدة للشاعر فراج بن سعد الفراج السبيعي (يرحمه الله)
" أوصيك "
بديت بسم اللي عليه إتكالي=اللي رفع سبعٍ بليّا عمدها
ومن بعدها نصيحة للعيالي=وأهل القلوب الطيبة ما أحسدها
نصيحة لأهل العقول الثقالي=وأهل النميمة يقلع الله ضمدها
أوصيك يا وسمي على كل عالي=ونصيحة الوالد عساك تحمدها
عليك بمناجاة رب الجلالي=اللّي خلق دنياك وأحصى عددها
ليا فات ثلثين وبقى ثلث تالي=أرفع يديك وفرصة الرب صَدَهَا
سمّاع بالخرسى دبيب النمالي=جند ضعيف ومنه يجري مددها
والوالدين بحقهم لا تبالي=ترد الحياض اللي نبيك وردها
يجيك يوم عنه مالك محالي=وحصيلة الإنسان قدمة وجدها
لولاك يا وسمي على القلب غالي=ماعبّرت روحي ولحد نشدها
عليك بالمعروف عند الرجالي=ليا صار تقدر قمّة المدح فدها
ضيفك وجارك والخوي والموالي=وجارتك ورعك لايبكّي ولدها
وثاني نصيحة يوم صار المجالي=ما أنسى الفروخ اللي تواصل هددها
فيصل ونايف جعلهُم لي ظلالي=ومن يزرع الشجرة لزوم يحصدها
الشط ماحد قارنه بالتفالي=والحنظلة مايندهن من زبدها
دنياك مثل الفئ عجل الزوالي=ماينعرف ميالها من ركدها
دنياً تقلّب بين مر وحالي=نوب كريم ونوب تبطش بيدها
من طاع ربه نالها بالكمالي=أدى الفروض وكل علياً صعدها
وصلاة ربي عد رمل السهالي=وعد النفوس اللّي خلت من جسدها
على النبي اللي مشى بالعدالي=في ساعة تقضي الأعمار وجهدها
وعداد ما ذعذع هبوب الشمالي=وعداد سكان البرور وبلدها
وعبّرت يوم أن المجال أستوالي=بقصيدة راع الردى ما قصدها