يا الله يلي في يديك التساهيل=ولا فيه شين عنك في الكون خافي
ياناصر محمد ومهلك هل الفيل=تجعل لنا من جود سترك لحافي
ومن بعد تكبيرن وحمدن وتهليل=بدعت لي قاف كما الدر صافي
سلام ياسبيع الرجال المشاكيل=اللي بطاريهم تطيب القوافي
ربعي هل الغلبا هل البن والهيل=وهل الشجاعه والنفوس الخفافي
اللي ليا صفو على سبق الخيل=طريحهم تبني عليه السوافي
رماح والخرمه ورنيه بتفصيل=رجالهم لاقال بالفعل يافي
وباق الرجال الهم معزه وتبجيل=والطيب ثوب فوق راعيه ضافي
دارن لعكفان الشوارب مداهيل=مهيب دار اهل النفوس الضعافي
توارثوها طيب جيل بعد جيل=يامالفو والفا عليهم ملافي
في دارهم يطربك صوت المعاميل=لاحافها الشغموم ولد السنافي
ثم صب رسلان على وزنت الكيل=فنجالها عن ضيقة الصدر شافي
ومن بعدها تقلط على قرح الحيل=بصوانين جزله اكبارن انضافي
وقال المعزب مرحبا بالرياجيل=وزود الشحم فيها عن العذر كافي
كرامتن تعمي عيون المهابيل=عيال الرخوم مذبحين العجافي
قول وفعل ماهي سوالف تهاويل=ابيت مشيد لنشامى يشافي
بيت زهته ام العيون المكاحيل=اللي خذت تاج الشرف والعفافي
مصيونت عن هرجة القال والقيل=ولاحطة الصوره بوجه الغلافي
في ديرتن وسم بها جارح السيل=تمشي بها لوكان برجل حافي